Para a súa nova tenda en Santiago -a terceira de Moksín e a primeira fóra de A Estrada- Fran, Tino e Ángeles tiñan moi claro o que querían: un espazo versátil e mutable onde poder expoñer un produto de calidade e que á vez permitise acoller actividades máis alá das propias dunha zapatería; un ambiente pensado para un público contemporáneo e elegante pero tamén desenfadado.
A idea de espazo ocupado, de pop-up store, é a que articula toda a intervención. Deixamos a parte inmoble totalmente diáfana, coa sensación de material en bruto de obra e con tonos escuros que potencian o efecto túnel que ten o local.
O mobiliario e a iluminación son os que resolven a ambientación e a articulación do espazo. O eixo lonxitudinal do local é seguido por todo o mobiliario. Os andeis lévanse ás paredes para que a súa altura non interfira na percepción xeral do local, e déixanse no centro dúas grandes mesas de cabaletes que soportan case todo o peso visual do ambiente. Nese mesmo eixo central descolgan varias lámpadas con pantallas realizadas en formigón, que reflicten ese equilibrio entre a calidez e o material en bruto que domina toda a intervención.