Ao longo do 2009 levouse a cabo unha intervención na ribeira do río Traba, moi preto da vila de Noia, que pretendía dun xeito tranquilo dignificar un espazo social ligado a unha longa tradición cultural e que hoxe ficaba desatendido. Neste proxecto integrámonos no equipo técnico da intervención, encargándonos da sinalización direccional, microtoponímica e de interpretación xeral do espazo.
Á hora de desenvolver un concepto gráfico-material para a sinalización que reflectira a diversidade de aproveitamentos do río, así coma o seu carácter vivo, tiñamos a dúbida de como xunguir na solución o binomio tradición-contemporaneidade. Un conxunto de sete pictogramas remítennos ás diferentes tipoloxías de aproveitamento hidráulico desde a perspectiva humana, estes pictogramas identifican os diferentes gremios a través de posicións corporais, cortes de roupa, apeiros e xeitos de transporte, extraídos de fotografías antigas.
No sistema de sinalización empregamos como materiais a cerámica e a chapa de zinc. A cor e porosidade da pasta cerámica fai referencia ás tonalidades da area con diferentes graos de humidade que o río vai depositando nas marxes, mentres que o zinc remítenos á tradicional aplicación deste material en caldeiraría e canos de recollida de augas. A sinalización complétase con dous paneis explicativos, un no acceso principal ao barrio e outro no lavadoiro, tradicional espazo de encontro.