O edificio 13Rosas é unha cooperativa de vivendas que se ergue na rúa do mesmo nome no barrio Compostelán de Santa Marta. A planta da edificación ten forma de ferradura, configurando en planta baixa un patio central delimitado por unha liña perimetral de soportais. A relación que se establece entre a zona asoportalada e central proporciona unha grande riqueza espacial, aportando unha ampla diversidade de matices de uso, co obxectivo de exercer de punto de encontro e fomentar a relación veciñal. Nun dos corpos laterais situase o local social, pensado para aloxar accións de ocio de carácter comunitario tanto infantís como para adultos.
Para equipar este espazo desenvolvemos un sistema de mesas e bancos de estrutura metálica e superficies de madeira, pensados para ser usados en interior ou exterior e almacenados de forma cómoda e rápida na parede do fondo. Para a zona de descanso prantexamos un sistema composto por unha serie de cestas metálicas modulares que poden ser usadas como mesa baixa, contedor de almacenaxe ou como estrutura de asento. O sistema péchase con dous tamaños de coxín que mediante a súa combinación permítennos conseguir tres tipoloxías diferentes de asento: sen respaldo, con respaldo baixo ou con respaldo alto. Por último na zona exterior colocáronse unhas pezas de asento colgadas que permite un suave balanceo.